45 分鐘的午餐
在德里幾日已經又攰又煩燥，空氣勁差成個天都是一幕一幕塵。今日在Connaught place 閒逛，一個較中產滿是名牌的地方，但同時係不同名店的門口會有堆女性跟小孩討吃，男人當擦鞋匠等。有些小孩沒鞋子沒褲，在身光頸靚的人堆中穿疏，整個現場在這裡顯得正常不過。
入左間算是貴的餐廳，其實都是幾十蚊一個餐。一坐底望出去見到有個小朋友執緊地下的垃圾食，已經忍唔著流左幾滴眼淚，點解我會坐左係入面食「食物」而出面的小朋友就食垃圾。後來有個賣花圈的小朋友敲玻璃，叫我比野佢食，侍應見到已經即刻走出去叫佢走，我示意請個小朋友入來一齊食。侍應有點難為情，最後都請左佢入來。小朋友無鞋著，入到來好新奇開心，其他食客眼望望咁。
我請侍應比個menu 小朋友，佢話小朋友應該唔識睇，就點多左個burger 餐。我將雞肉burger 切開兩份，叫左薯條同可樂比佢，本來佢是用手食的，後來問我拎叉，最後都是用返手，食完就黏手hi 落件衫到，再不斷摸個玻璃，一個一個油林林的手印。我比濕紙巾佢，佢唔識用，我示意擦擦隻手，擦完成張紙是黑色的。
小朋友話要埋我個份chicken，係間餐廳到走來走去，侍應好尷尬叫佢坐好。餐廳內既人都好好奇走過來影相，大概大家都好小見呢種小朋友會係到食野。
我同小朋友語言不通講唔到野，只是用手勢叫佢乖乖坐底食野，問佢good? Ok? 佢隻手指甲菌晒黑邊，沒有鞋著，上衣好髒，其實好難想像佢會行入任何一間店或餐廳。
階級身份就是這樣，小朋友一家好像永遠只能在大街上賣筆（上年就在同一地遇到賣筆小孩，為了兩蚊跟著幾條街），賣花圈，甚至貨都無，就坐在街上討錢。街道橋底就是家，好既話會有塊尼龍布。永遠隔著一層「名店」的玻璃，遠遠觀看。
小朋友食到好飽，可樂飲左兩啖，水就飲晒，拎著十盧比（即港幣一兩蚊）好開心比我睇，應該係今日既生意。最後佢話要影張相，拎起花圈跳下跳下走出餐廳，繼續他的生活。
後來門口又有一個婦女同BB問我拎野食，我再點了一份打包出去。一蹲底係地下，個個BB是執緊地下的塵來食，成咀塵加口水鼻涕，我好想喊，最後衝衝放下食物就離開。
我無比錢，只能給予食物飽足幾小時，只知道階級貧困缺乏教育一代傳一代，小孩只能一直這樣。
Search